Cabdiwali M Cali Gaas Waxaan Qabaa Inuu Somaliya Nabaddii Ku Soo Celin Karo

July 28, 2012 // Warar Somaali

Waxaan ku bilaabayaa magaca Allah ee naxariista oo Dhan iska leh

Akhristaha qaaya iyo qiimaha badanoow waxaa mudan inaan is waydiino horta Nabad la’aanta maxaa keena maxaase soo celin kara nabaddii…

Nabad La’aanta waxaa keena

· Markii la waayo kalsoonidii iyo is aaminkii bulshadaas ka dhaxaysay
· Markii la waayo xurmaddii iyo is ixtiraamkii bulshadaas ka dhaxaysay
· Markii la waayo turaanshihii iyo isu arxankii bulshadaas ka dhaxaysay
· Markii la waayo dulqaadkii iyo isu samirkii bulshadaas ka dhaxaysay
· Markii la waayo is maqalkii iyo kala danbayntii bulshadaas ka dhaxaysay…iwm.

Arimahaas markii bulsho laga waayo waxaa ka dhex dillaaca cudur, cudurkaas oo gayeeysiiya ama gaarsiiya in qof kastaa qofkuu ka xoog badan yahay maquuniyo oo xoriyadiisa udiido waxuuna isu bedelaa oo abuuraa kooxaysi iyo is gaashaan buursi ku salaysan sad bursi iyo anaa amiir anta amiir. Nabaddii iyo xasiloonidii umadaasi lahayd farahay ka baxdaa waxaana ku basbeela in alaale intii danyarta ahayd oo aan itaalka badan lahayn ee bulshadaas ka tirsanayd.

Nabad la’aantaasi Waxay dhaxal siisaa bulshadaas awood la’aan iyo itaal la’aan aanay bulshadaasi waxna qabsan karin cidna iska celin karin arintaasina waxay sababtaa in sharaftii, sumcaddii, karaamadii ay meesha ka baxdo bulshadaasi lahayd.

Waana waxa haysta maanta bulshadeenii Somaliyeed ee sharafta sumcada iyo karaamada lahayd oo cadowgeedu ka biqi jiray dadka kalana ku ixtiraami jireen. Waad aragteen maanta waxa baddeenii lagu hayo ee ah in khayraadkeedii layska daldalanayo, sun lagu daadinayo, qaybo lakala gadanayo, qaybo lagu soo faafayo, qaybihii xoogga laynooga haystay la doonayo in laynaga sharciyeeyo (NFD iyo Ogandenya). Wax awood ah oo aan ku diidi karnaana aanay jirin in qaarkeen qayl qayliyo oo aan cidina dhagaysan oo dhag jalaq loosiin, qaarkeenna isha ka mirigsiiyo.

Nabadda waxaa soo celin kara

· Markii la soo cesho kalsoonidii iyo is aaminkii bulshadaas ka dhaxaysay
· Markii la soo cesho xurmaddii iyo is ixtiraamkii bulshadaas ka dhaxaysay
· Markii la soo cesho turaanshihii iyo isu arxankii bulshadaas ka dhaxaysay
· Markii la soo cesho dulqaadkii iyo isu samirkii bulshadaas ka dhaxaysay
· Markii la soo cesho is maqalkii iyo kala danbayntii bulshadaas ka dhaxaysay…iwm.

Ruuxa aan isleeyahay oo filayo inuu soo celin karo nabadii waa Cabdiwali M Cali Gaas sababtoo ah waa ruux…

· Dareen iyo Damiir leh oo ka damqanaya foolxumada iyo sumcad xumada soo wajahday bulshada.
· Ixtiraam leh oo soo dhowaynaya dhammaan bulshada oo dhan isagoon ku kala soocayn jeebkooda iyo kooxday ka tirsan yihiin dhagaysanaya afkaartooda ku salaysan sidii xal lagu gaari lahaa.
· Dulqaad leh oo u dulqaadanaya dhammaan caqabadaha ka horyimaada.
· Naxariis iyo utirid leh oo ka naxaya dhammaan dhibaatada soo food saartay bulshadaas yar iyo wayn.

Hadaladiisii aan ka soo xigtay oo aan kusoo qoray maqaalkii ahaa la kulankii wax iga bedelay waxaa ka mid ahaa

in aan hooyo danbe barooran oo aanay ka walwalin habeenkii masoo toosaysaa adiga iyo eheladaada oo wada dhan…
in aan waalid danbe eegan dhashoodii oo hortooda lagu gawracayo
in dhallinyaradu habeen iyo maalin meeshay doonaan ku cayaaraan iyagoon ka baqayn in la laayo
in eheladu habeenkii farxad iyo kaftan ku caweeyaan iyagoon ka wel welayn in madfac ku habsado
in aan la soo toosin subaxdii oo lagu waa bariisan maydad madaxyadii laga gooyey
in aan cidina cid khasab kaga haysan hantidoodii iyagiina cidla jiifaan oo dayac iyo saxiir ka dhergaan
in dhammaan bulshada Somaliyeed hesho Nabad ay u wada Siman yihiin Sharci ay u wada Siman yihiin wax barasho ay u wada Siman yihiin xoriyad ay u wada siman yihiin iyo inay baqdin la’aan mari karaan meeshay doonaan iyadoon cid is hortaagayso jirin ama ay ka cabsanayaan…