Madaxweynaha Somalia oo ku dhawaaqaya Ra’isulwasaare cusub

Warar lagu kalsoonaan karo oo ka imaanayaa magaalada Muqdisho, ayaa tilmaamaya M/weyne Xassan Sh. Maxamuud in uu qoondaynayo saacadaha innagu soo  aaddan in uu si rasmi ah ugu dhawaaqo R/wasaaraha cusub ee dalka.

Ilo-xog-ogaal ah, aadna ugu dhaw madaxtooyada Soomaaliya ayaa tilmaamaya suuragalnimada R/wasaaraha cusub ee Soomaaliya in uu noqdo Saacid Faarax Garaad, oo ka mid ah xubnihii loolanka xooggan ugu jiray baadi-doonka xilka R/wasaaraha.

Wararka qaar, ayaa tilmaamaya magacaabista Saacid Faarax Garaad, in ay ka soo dhammaatay xafiiska M/weynaha ayna dhimman tahay oo kaliya faafinta warqadda magacaabidda taasoo laguba waday caawa in la shaaciyo, hase ahaatee sababo xilliyeed iyo kala cudur-daarrasho isku-imaatin darteed ay ugu dhacday berri oo Sabti ah.

Ilo-wareeddadu, waxay intaas ku darayaa berri subax in si rasmi ah loo shaacin doono R/wasaaraha, waxaana jiray dhawrkii maalmood ee ugu dambeeyey, galaangal iyo la kulmid uu waday Saacid Farax Garaad, uuna la lahaa wax-ku-oolka beelaha Soomaalida, taasoo la tilmaamayo in ay gogol-dhig u ahayd magacaabiddiisa.

Inkasta oo warkaan ay jiritaankiisa dhabaynayaan ilo kala duwan, haddana ma jirto wali qoraal rasmi ah oo ka soo baxay xafiiska M/weynaha oo ay warbaahintu heshay.

Dhanka kale Xildhibaan Siciid C/laahi Deni oo isaguna kamid ahaa raga xalay [Khamiis] la kulmay Madaxweynaha Somalia, islamarkaana ah siyaasi kulaalayey inuu xilkan qabto ayaa caawa [Jimce] misana mar kale laga wacay madaxtooyada Villa Somalia, lamana oga wixii lagu wargaliyey Xildhibaan Siciid C/laahi Deni.