Xildhibaano Jaan {Safiyo Aw Axmed Xaaji}

Anigoo ah  Safiyo Aw Axmed Xaaji (dhalkheyr) ayaan doonayaa inaan idiin soo bandhigo Tix-aan ugu jawaabay Abwaan da,yar oo soomaaliyeed oo la yiraahdo Cabdirashiid Maxamed Cali Caaqilka kaasoo curiyay maanso uu ugu magac daray Xil ma saarna–oo uu ku falanqaynayay waxqabad la,aanta baarlamaanka dowlada federaalka ah ee Soomaaliya.

Su,aalona uu umada Soomaaliyeed ku waydiinayay anigu waxaan isku dayay inaad Ka jawaabo inbadan oo su,aalihiisii kamid ah sheegona xaqiiqada xildhibaanada uu ka hadlay iyo xubnaha ka tirsan maansadana waxaan u bixiyay oo ugu wanqalay Xildhibaano Jaan; waxaan iri

Xubno maaha duulkani 
Xayawaano weeyaan
Xoolaha waa ka liitaan 
Xaqsoor daa warkiisaba 
Xaqdaraday ku naaxaan
Xeerbeegti maan arag
Xildhibaana maba jiro
Xilkas iyo aqoonyahan
Xabaal baa nus loodiray
Xabsigana nuskii kale
Xaajadoodu waa saas
Xeero lala wareegiyo
Xoolo doono mooyee
Xishood waa la tuuroo
Xayadiyo asluubtii
Xabaal bay ku duugeen

Afartaa xasiliyayeh
Xagaygana su,aalaha
Xuuraamin sheekada
Xaqiiqiyo jawaab doon
Xalka aynu goobneeh
Haduu lumay xaqdhowrkii
Xagee baan ka doonaa??
Xornimada la xirayoo
Xerada ay ku oodeen
Sidee uga xoraynaa? 
Xujadoo aqooniyo
Xaajadoo ka tagidiyo
Xaasidkoo la faanshiyo
Xabiibkoo la dayrshaa
Xumaheeda aragnaye
Xalkeedii ma dhowyahay?

Afartaa xasiliyaye xorta aan u daadago
Xoodaaminteediyo xoorkeeda
Maansada aan idiin xantoobshee
Dadku inuu xan daaq yahay
Xogtana aan wadaagnoo
Xukun iyo dastuur jiroh
Xuduud iyo leh qaanuun
Xasilin kara dhibaatada
Xannibi kara balaayada
Xarbigana idlayn karah
Xuub igama saaree
Xildhibaanadaan jaan
Xogtaa tolow ma seegeen?

Miyaan xarafba loo dhigin?
Xumaan aysan garan karin?
Xeer miyaan lasoo barin?
Xarbi inuu inkaar yahay
Xasilooni dahab tahay
Xornimadu macaan tahay
Xaq wadaninimadu tahay
Xildhibaanadaan jaan
Tolow may xusuustaan?
Xubnihii federaalku
Xal u waaye dalkii
Xilkana waa sidayaan
Hadii aan laga xoogin
Xufna aan laga siinin
Wadani uusan xanaaqin
Dumarku xiisad bilaabin
Dhalintu xaalka dareemin
Xogogaalna wax sheegin
Xaqsoor uusan dhawaaqin
Xaqdaro aysan salguurin
Xakiimna uusan dulaynin
Xarafkaasi dhab weeye 
Xaqiiqdii la hubaaye 
Xigtadooy iga hooya
Xifdiyoo wax ku qaata

Xumaantaa xamar taala
Xinjirahaa qulqulaaya
Xabadaa ka dhacaysa
Shacabkaa la xasuuqay
Xarakaadka shabaabka 
Xisbigaa amnisoomka
Iyo xaynta shariifka
Xanuunkeedu ma taaban
Xummadeedu ma gaarin
Xukun baana u muuqda
Xoolona way ku cunaan
Xoogsi bay ka dhigteen
Xil ma saarnana weeye
Xaakimna waa arkayaa
Xarafkaasi dhab weeye
Xaqiiqdii la hubaaye
Xigtadoy iga hooya
Xifdiyoo wax ku qaata

Sakiinkaad xasadkiisiyo
Xilka uu ku dagaaliyo
Xubnahuu kala geeyiyo
Xumaantiisa tilmaantay
Xiri maayo shariifku
Xiriir baa ka dhexeeya
Xan hoosaa lagu sheegay
Xoogaaguu la cunaaa
Xisaab bay isku raaceen
Xarigna waa ka mamnuuc
Xuuraamin aan ku sameeyay
Xogtii aan ka aruurshay
Xaqiiqdeedu wataase
Idinkoon i xumaansan
Xarafkaasi dhab weeye 
Xaqiiqdii la hubaaye
Xigtadoy iga hooya
Xifdiyoo wax ku qaata

Xiisad yaysan i qaadin
Xogtana aan ururshee
Xakiim aan u rujuucno
Xumaanta aan iska dayno
Xaqana aan u gargaarno
Xilka yaan lagu dheelin
Xooluhu waa dhalanteede
Xeeryahaan ku gurayno
Xabaal baan kagalaynaa
Xisaabna way ka dambayn
Xalaasha aan ku dadaalno
Xaliim hayna hanuunsho
Xarbiga haynaga qaado
Xalkana haynagu beego
Xumaan haynaga suulsho
Xaqana haynagu aadsho

Aamiin Aamiin Aamiin

Qore: Safiyo Aw Axmed Xaaji (dhalkheyr)
Email: dhalkheyr@hotmail.com